‘
Veurjaor
Al vröst et naachs zo now en dan nog,
Al is de wiend ok nog wat schraol,
Toch kuj’ et veurjaor al weer marken,
En ‘t krigt weer leven, allemaol!
De neuteboom zit stiefvol katties,
De zoegepap komt al in ‘t blad.
De vleer, de burk en de sepiepen
Ver-eren allegeer’ al wat.
De katte wodt weer slim uuthuzig
En hoolt je naachs haost uut de slaop.
De kalver bin weer in de goorn,
D’r bin al laomer bi’j et schaop.
De protters togen al mit roegte
En vliegen al mar an en van.
De eksters bouwen ‘t oolde nust op
En sjouwen liem en prikken an.
De kiewiet ropt: Ik bin d’r wéér, heur!’
En dukelt al weer over ‘t laand.
En stieve Jan, die oolde knapperd,
Hadde oonze maegd laest bi’j de haand…
Et veurjaor maekt weer alles aanders!
Et maekt je zuver overstuur!
‘t Is rond-om-toe weer ni’j, jong leven!
Et wodt weer mooi in de netuur!
(van: klassiek auteur in et Stellingwarfs H.J. Bergveld; in: De Oost-Stellingwarver 1938)